Rosebud
Huling salita ni
German
bago siya nagtungo sa
templo
ng Rashomon
upang itanong
kung natutulog nga ang
Diyos
at upang sa wakas ay
matulog,
Huwag lang sanang
guluhin
ng isang asong
kumakalkal ng buto
Rosebud
Kasingkahulugan ka ba
ng isang pangarap ng
kamusmusan?
ng isang pangarap na
sasakyan
sa taglamig at
tuluyang sinunog?
Rosebud
Hinulaan ka nilang mga
lumuha
subalit hindi ka nila
lubusang kilala
Hindi nila matalupan
ang polbos mo
at mga kulay sa mukha
Rosebud
Maging mga pantas at
propesor
ay walang pagbatid sa
ano o sino ka
Rosebud
ikaw ba ay isang
salita
na nangangahulugan ng
salitang buhay
tulad ng ginagawa
ng mga makatha at
pilosopo
bilang huling salita
ng hiwaga?
Vida!
Rosebud
ikaw ba ay isang
kometang
dumating upang umalis
isang bituin na kapag
patay na
at kapag sumabog
ay saka mas maliwanag?
Rosebud
Inatake ka sa puso
para patunayan na may
puso ka
Rosebud
ikaw pala ay isang
salita
na napulot lamang
at wala talagang
kahulugan,
isang salita
na nangangahulugang
walang kahulugan,
isang salita
na sinabi lang niya
upang ipagtanong
at ipahayag ang
kawalang-kahulugan
No comments:
Post a Comment